“Монголын хөрөнгийн бирж” ХК-иас өнөөдөр (2025.09.15) “Элит” олон улсын дунд сургуулийн ахлах ангийн 150 орчим сурагчдад “Залуу хөрөнгө оруулагч сургалт”-ыг зохион байгууллаа.

Сургалтыг нээж “Монголын хөрөнгийн бирж” ХК-ийн Гүйцэтгэх захирлын үүргийг түр орлон гүйцэтгэгч Б.Дөлгөөн хэлсэн үгэндээ:

“Монголын хөрөнгийн бирж нь Хувьцаа, Бонд, Хөрөнгөөр баталгаажсан үнэт цаас, Хөрөнгө оруулалтын сангийн нэгж эрх зэрэг бүтээгдэхүүн арилжаалахын зэрэгцээ олон нийтэд санхүүгийн мэдлэг олгох чиглэлд анхаарч, тодорхой сургалтуудыг төлөвлөн зохион байгуулдаг. Олон нийтийн өмнө хүлээсэн энэхүү үүргийнхээ хүрээнд зах зээлд оролцогч бусад байгууллагуудтай хамтарч ЕБС, Их сургуулиуд болон бусад бүлгүүдэд санхүүгийн боловсролыг олгох сургалтыг явуулсаар байна” гэдгийг онцлоод өөрийн суралцах үйл явцын түүх болон сурагч насандаа ирээдүйн ажил, амьдралын зорилгоо хэрхэн тодорхойлсон тухай, мөн зорилгодоо хүрэхийн тулд сорилуудыг хэрхэн даван туулсан талаарх туршлага, мэдээллээ хуваалцсан юм.

Үргэлжлүүлэн:

• “Стоклаб секьюритиз ҮЦК" ХХК-ийн  Захирал Ё.Амарбат “Хөрөнгө оруулалтын төрөл, түүний ач холбогдол” сэдвээр,

• "Ард Секюритиз ҮЦК" ХХК-ийн Хөрөнгө оруулалтын зөвлөх Э.Лхагвасүрэн “Багц бүрдүүлэлт” сэдвээр,

• Монголбанкны Ахлах эдийн засагч Н.Батжин “Финтек ба криптовалют” сэдвээр,

• "Монголиан нэйшнл рэйтинг" ХХК-ийн ТУЗ-ийн дарга Ц.Хуяг “Хувь хүний санхүү” сэдвээр тус тус сургалт, мэдээлэл өгч төгсгөлд нь “Стоклаб секьюритиз ҮЦК" ХХК-иас дээрх сэдвүүдийн хүрээнд агуулгыг бататгах асуулт, хариултын QUIZ уралдааныг зохион байгуулж, гурван сурагчийг хувьцаа худалдан авах эрхийн бичгээр урамшууллаа.

“Элит” олон улсын дунд сургуулийн ахлах ангийн сурагчид

МОНГОЛЫН ХӨРӨНГИЙН БИРЖ