“Говь” ХК нь 2025.09.08-ны өдөр хэлбэрээ өөрчлөн хязгаарлагдмал хариуцлагатай компани /ХХК/ болох шийдвэр гаргасантай холбогдуулан Санхүүгийн зохицуулах хорооноос хяналт шалгалт хийсэн.

Улмаар “Говь” ХК-д хяналт шалгалтаар илэрсэн зөрчил, дутагдлыг арилгаж, компанийн үйл ажиллагаа, санхүүгийн нөхцөл байдлыг сайжруулсны дараа хувьцааны бодит үнэлгээг хөндлөнгийн үнэлгээний байгууллагаар дахин хийлгүүлэх үүрэг даалгаврыг хүргүүлсэн байна. 

Түүнчлэн Санхүүгийн зохицуулах хорооны эрх зүйн байдлын тухай хууль, Үнэт цаасны зах зээлийн тухай хуулиар олгогдсон чиг үүрэг, бүрэн эрхийн хүрээнд хөрөнгө оруулагч, үйлчлүүлэгчдийн эрх ашгийг хамгаалах шаардлагын дагуу хяналт шалгалтаар илэрсэн асуудлыг шийдвэрлэж, “Говь” ХК-ийн 10.3 хувийн хувьцааг эзэмшиж буй 25,000 гаруй жижиг хувьцаа эзэмшигчийн эрх ашиг хамгаалагдах хүртэл тус компанийн хэлбэрээ өөрчлөх ажиллагааг зогсоосон болохыг мэдэгдлээ.

“Говь” ХК нь нээлттэй хувьцаат компанийн хувьд үнэт цаасны зах зээлийн холбогдох хууль тогтоомжийн хүрээнд санхүүгийн болон санхүүгийн бус мэдээллийг олон нийтэд нээлттэй, ил тод мэдээлэх үүрэгтэй бөгөөд “Говь” ХК-ийн хувьцаа нь Монголын хөрөнгийн бирж дээр хэвийн арилжаалагдаж байна.

Санхүүгийн зохицуулах хорооноос гаргасан дэлгэрэнгүй мэдээлэлтэй энд дарж танилцана уу!

МОНГОЛЫН ХӨРӨНГИЙН БИРЖ