Лондонгийн хөрөнгийн бирж, Төрийн өмчийн хороо болон Монголын хөрөнгийн биржийн хооронд байгуулагдсан стратегийн түншлэлийн гэрээний хүрээнд өнөөдрөөс буюу 2012 оны 7 дугаар сарын 02-ны өдрөөс үнэт цаасны арилжаа, төлбөр тооцоо, хадгаламж, хяналтын Миллениум Ай Ти системийг Монголын хөрөнгийн зах зээлд нэвтрүүллээ.
Олон улсын стандартад нийцүүлэн шинэчлэн найруулсан дүрэм, журмын дагуу зах зээлийн оролцогчдод тодорхой шаардлага тавигдаж байгаа бөгөөд одоогоор энэхүү шаардлагыг хангасан 5 (таван) брокер, дилерийн компани шинэ системээр хийгдсэн өнөөдрийн арилжаанд оролцсоныг мэдэгдэхэд таатай байна.
Бусад брокер, дилерийн компаниуд шинэ шаардлагыг хангахаар төлбөр тооцоо гүйцэтгэгч банкуудтай хамтран ажиллаж байгаа бөгөөд ойрын хугацаанд арилжаанд оролцогч компаниудын тоо улам нэмэгдэнэ гэдэгт итгэлтэй байна.